ტკივილი სქესობრივი კავშირის დროს
რატომ შეიძლება გახდეს სქესობრივი კავშირი მტკივნეული მენოპაუზის პერიოდში.
რა არის ეს?
მენოპაუზა ზოგჯერ სასქესო და საშარდე სისტემაში ცვლილებებს იწვევს. ამ ცვლილებებით გამოწვეულ სიმპტომებს ერთად მენოპაუზის გენიტოურინარულ სინდრომს უწოდებენ და მათგან ყველაზე ხშირი სწორედ სქესობრივი კავშირის დროს ტკივილია.
ტკივილი შეიძლება გარდამავალ პერიოდში ან მენოპაუზის შემდეგ დაიწყოს. ის შეიძლება იყოს წვის ან ქავილის მსგავსი. ზოგ ქალს საშოდან გამონადენიც აქვს. თუ ტკივილი მუდმივია და სქესობრივ კავშირს არ უკავშირდება, წაიკითხეთ გვერდი საშოს ტკივილი და სიმშრალე.
ტკივილის მიზეზი ხშირად საშოს სიმშრალეა. როგორც პერიმენოპაუზაში თმა, კანი და თვალები შრება, ისე შეიძლება გამოშრეს საშოც. თუ ბუნებრივი სინოტივე საკმარისი არ არის, პენეტრაცია იწვევს გაღიზიანებას, ხახუნს, ქავილს ან წვას.
ტკივილი შეიძლება იმითაც იყოს გამოწვეული, რომ საშო „ზედმეტად ვიწრო“ გახდა და პენეტრაცია მტკივნეული ან შეუძლებელია.
ზოგჯერ ტკივილი და დისკომფორტი სქესობრივი ცხოვრების მიმართ ინტერესს ამცირებს. ჯერ ტკივილი უნდა შემცირდეს და მხოლოდ შემდეგ ღირს ფიქრი იმაზე, როგორ გავზარდოთ ლტოლვა.
რა ხდება ორგანიზმში?
პერიმენოპაუზაში საშო და ვულვა (გარეთა სასქესო ორგანოები საშოს შესასვლელის ირგვლივ) იცვლება: მცირდება სისხლის მიმოქცევა, ნერვული სიგნალების გადაცემას მეტი დრო სჭირდება, ლორწოვანი თხელდება და უფრო გლუვი ხდება, ბუნებრივი სინოტივე კი ხშირად იკლებს.
ამ ცვლილებებს ექიმი გასინჯვისას ამჩნევს და მათ „გენიტოურინარულ ატროფიას“ უწოდებს. თუმცა ხილული ცვლილებები ყოველთვის არ ემთხვევა სიმპტომებს: შეიძლება ატროფიის ნიშნები გქონდეთ, მაგრამ არაფერი გაწუხებდეთ.
რას უნდა ველოდოთ?
ეს პრობლემები უფრო ხშირია ბოლო მენსტრუაციის მოახლოებისას და განსაკუთრებით მენოპაუზის შემდეგ, როცა ესტროგენის დონე დაბალია.