სქესობრივი ლტოლვის დაქვეითება

რატომ შეიძლება შემცირდეს სქესობრივი ლტოლვა პერიმენოპაუზაში და როდის მივმართოთ ექიმს.

რა არის ეს?

პერიმენოპაუზის დაწყებასთან ერთად ზოგ ქალს სქესობრივი ცხოვრების მიმართ ინტერესი უმცირდება. ამას ხშირად „ლიბიდოს დაქვეითებას“ უწოდებენ. შეიძლება შემცირდეს სიამოვნებაც და ორგაზმის სიხშირეც.

თუ ინტერესი იმიტომ შეგიმცირდათ, რომ სქესობრივი კავშირი მტკივნეულია, პირველ რიგში ტკივილის შემცირებაზე უნდა იზრუნოთ. სხვა შემთხვევაში მიზანი სიამოვნების გაზრდაა.

რა ხდება ორგანიზმში?

სქესობრივი ლტოლვა ასაკთან ერთად ორივე სქესში მცირდება. 40–50 წლის ქალებში დაბალი ლტოლვა ხშირია, თუმცა ყველას არ ეხება.

ასაკთან ერთად ნერვები და სისხლძარღვები იცვლება და ნერვული სიგნალების გადაცემას მეტი დრო სჭირდება. ეს მთელ სხეულში ხდება, მათ შორის საშოშიც. შედეგად შეიძლება შემცირდეს მგრძნობელობა, ბუნებრივი სინოტივე და აგზნება, ორგაზმის მიღწევა კი გაძნელდეს.

ზოგ ქალს ლტოლვა, პირიქით, ემატება, ზოგი კი ცვლილებას საერთოდ ვერ ამჩნევს. მნიშვნელოვანია გვახსოვდეს, რომ სქესობრივ ინტერესზე მოქმედებს ფსიქოლოგიური, კულტურული, პიროვნული, ურთიერთობასთან დაკავშირებული და ბიოლოგიური ფაქტორების მთელი სპექტრი. თქვენთვის ეს შეიძლება პრობლემა იყოს, შეიძლება არა.

რას უნდა ველოდოთ?

ზოგ ქალს პოსტმენოპაუზაში სქესობრივი ლტოლვა ემატება: თავს უფრო თავისუფლად გრძნობს, რადგან კონტრაცეფციაზე ფიქრი აღარ უწევს.

როდის მივმართოთ ექიმს?

თუ ლტოლვის დაქვეითება გაწუხებთ, უთხარით ექიმს. გამოკვლევით შესაძლებელია სამედიცინო ან ფსიქოლოგიური მიზეზების გამოვლენა და მათი მკურნალობა.