თვალის სიმშრალე
მშრალი თვალის სინდრომი მენოპაუზის პერიოდში უფრო ხშირია. გაიგეთ, რატომ ხდება ეს.
რა არის ეს?
მშრალი თვალის სინდრომის დროს თვალი საკმარისად ვერ გამოიმუშავებს ცრემლსა და სხვა ნივთიერებებს, რომლებიც მის ზედაპირს ატენიანებს. შეიძლება იგრძნოთ დისკომფორტი, წვა, სინათლის მიმართ მომატებული მგრძნობელობა, „ქვიშის“ ან უცხო სხეულის შეგრძნება. მხედველობა შეიძლება დაიბინდოს, თვალები კი სწრაფად დაიღალოს. ზოგჯერ თვალი საპასუხოდ, პირიქით, ცრემლდება.
ქრონიკული სიმშრალის უგულებელყოფა არ ღირს: მკურნალობის გარეშე მან შეიძლება მხედველობა გააუარესოს.
რა ხდება ორგანიზმში?
თვალს ცრემლის თხელი შრე ფარავს, რომელიც ცხიმის, ლორწოსა და წყლის შრეებისგან შედგება. გარდამავალ პერიოდში ცრემლი შეიძლება უფრო სწრაფად აორთქლდეს.
ესტროგენისა და ტესტოსტერონის შემცირება მოქმედებს ქუთუთოს სპეციალურ (მეიბომის) ჯირკვლებზე, რომლებიც ცრემლის აორთქლებისგან დამცავ ცხიმს გამოიმუშავებს. როცა ცხიმი ნაკლებია, თვალი ადვილად შრება. ქრონიკულმა სიმშრალემ შეიძლება ეს ჯირკვლები დააზიანოს, ამიტომ პრობლემას დროულად უნდა მიაქციოთ ყურადღება.
რას უნდა ველოდოთ?
გარდამავალი პერიოდის დაწყებასთან ერთად თვალის სიმშრალის რისკი იზრდება. მშრალი თვალის სინდრომი დიაგნოსტირებული აქვს ზრდასრული ქალების დაახლოებით 9%-ს და ქალებში ის დაახლოებით ორჯერ უფრო ხშირია, ვიდრე მამაკაცებში. სინდრომი თავისით არ გაივლის, მაგრამ მდგომარეობის შემსუბუქება შესაძლებელია.
თვალის სიმშრალეს ხელს უწყობს:
- დაავადებები: დიაბეტი, ფარისებრი ჯირკვლის დაავადებები, რევმატოიდული ართრიტი, შეგრენის სინდრომი, წითელი მგლურა;
- თვალთან დაკავშირებული ფაქტორები: თვალის ლაზერული ოპერაცია, კონტაქტური ლინზების ხანგრძლივი ტარება;
- კვამლი და მოწევა;
- გარემო: მშრალი ჰაერი, ძლიერი ქარი, ძლიერი სიცხე ან სიცივე, დაბინძურებული ჰაერი, მტვერი;
- მედიკამენტები: ზოგიერთი ანტიჰისტამინური, ანტიქოლინერგული, ბეტა-ბლოკატორი, შარდმდენი, დამამშვიდებელი და ანტიდეპრესანტი, კუჭის მჟავიანობის დამწევი და საძილე საშუალება.